Guðrún Þ. Stephensen er látin

Guðrún Þ. Stephensen, leikkona, er látin 87 ára að aldri. Guðrún fæddist 29. mars 1931 í Reykjavík og lést þann 16.apríl 2018. Foreldrar hennar voru Dóróthea Breiðfjörð og Þorsteinn Ö. Stephensen leikari en eftirlifandi eiginmaður Guðrúnar er Hafsteinn Austmann myndlistarmaður og dætur þeirra eru Dóra og Kristín Hafsteinsdætur.
Guðrún lauk prófi frá Leiklistarskóla Þjóðleikhússins árið 1954. Hún lék hjá Leikfélagi Reykjavíkur að námi loknu og starfaði þar í tvo áratugi. Meðal hlutverka hennar hjá LR eru Madge í Tíminn og við, Marina í Vanja frænda, Magdalena í Húsi Vernörðu Alba, Mariska í Það er kominn gestur, Bessí Burgess í Plógi og stjörnum og kvenhlutverk í leikritum Jökuls Jakobssonar, Dómínó og Kertalogi.
Guðrún var fastráðin við Þjóðleikhúsið um árabil og lék þar á fimmta tug hlutverka. Meðal eftirminnilegra persóna sem hún lék þar eru kerlingin í Gullna hliðinu, Soffía frænka í Kardemommubænum, Sólveig í Lúkasi, Stella í Sólarferð, móðirin í Þeir riðu til sjávar, Lóna Hessel í Máttarstólpum þjóðfélagsins, frú Arneus í Íslandsklukkunni og Valborg í Valborgu og bekknum. Síðasta hlutverk Guðrúnar við Þjóðleikhúsið var Fríða í hinni geysivinsælu sýningu Manni í mislitum sokkum, en þar lék hún meðal annars með öðrum þekktum leikurum af sinni kynslóð, Þóru Friðriksdóttur, Bessa Bjarnasyni, Gunnari Eyjólfssyni, Helgu Bachmann, Árna Tryggvasyni og Erlingi Gíslasyni.
Guðrún lék einnig mörg hlutverk í útvarpi, sjónvarpi og kvikmyndum. Hún sat um árabil í þjóðleikhúsráði, starfaði við barnakennslu meðfram leiklistinni, lengst af í Kársnesskóla.